Isa 41 | MEU | STEP | Kone tanodia e, asi reḡereḡemui a hakala henigu; q2 bese idau-idau ese edia goada bae hamatamata; raka kahi mai, bena bae hereva; baita raka kahi hebou, hahemaoro totona.

Isaiah 41

Dirava ena gwauhamata Israel enai

1 Kone tanodia e, asi reḡereḡemui a hakala henigu; q2 bese idau-idau ese edia goada bae hamatamata;
raka kahi mai, bena bae hereva;
baita raka kahi hebou, hahemaoro totona.

2 Daika ese tau ta mairiveina kahana amo e hatorea isi?
Una tau na ena dala idoinai e kwalimu louloumu.
Ia ese basileia idau-idau na una tau vairanai e hadarerediamu,
bena una tau ese hanua pavapavadia na aena amo e moidia taomu;
ḡahu heḡereḡerena ai e halaodiamu, ena dare amo,
rei kakoro lai ese e odaiamu heḡereḡerena ai e halaoamu, ena peva amo.
3 E hahavadiamu, bena e raka e laomu mai namona ida;
ia ese do se rakalaidia daladia amo e laomu.
4 Ina na daika ese e havaraia bona e karaia,
bona matamana negana amo uru ta ta vada e boiridia?
Lau na Iehova; lau na gini-gunana,
bona lau na gini-gabena ida; Lau na Ia.

5 Kone tanodia vada e itaia, bena e garimu;
tanobada dokodia na e heude-heudemu;
idia na vada e raka kahi mai.
6 Iboudiai ese ta ta dekena tauna dekena tauna e durudiamu,
bona tadikakadia e hamaorodiamu, e tomu:
A boga auka.
7 Ima idibaka tauna esegold iḡaukaralaina tauna e hagoadaiamu,
bona auri ihodo-palakana tauna ese haheato-kau aurina e hodoamutauna e hagoadaiamu;
auri ihahekamo-kubouna e herevalaiamu, e tomu “Ena na namo”,
bena idia ese ikoko amo e kokoamu, basine marere diba halaoreana.

8 A oi, Israel, egu hesiai tauna,
Iakob, vada na abia hidi tauna,
turagu Abraham garana;
9 oi, tanobada dokodia amo na abimu
bona gunigunidia amo na boirimu taumu,
na hamaoromu, nato: Oi na egu hesiai tauna,
vada na abimu hidi, asina kahumu nege.
10 Basio gari, badina be lau na oi ida;
kudoumu basine hetaha, badina be lau na oiemu Dirava;
baina hagoadamu, baina durumu,
imagu idibana mai kwalimuna ida amo baina imudamu tao.

11 A itaia, e badu henimumu taudia iboudiai na
bae hemarai bona bae baia;
e tuari henimumu taudia na
bae boio bona bae mase ore.
12 E heai henimumu taudia na ba tahudia,
to basio davaridia;
e tuari henimumu taudia na
bae boio vaitani.
13 Badina be lau Iehova, emu Dirava, ese
oi imamu idibana na dogoa taomu;
lau ese na hamaoromumu, na tomu:
Basio gari, baina durumu.

14 Oi Iakob, biluga e, basio gari!
Israel taumui e, basio gari!
Iehova na e tomu “Baina durumui”.
Ihamaurimui na Israel ena Helaḡa Diravana.
15 A itaia, lau ese uit ikwadilaina auna ai baina halaomui,
matamatana, mai ganona bona mai isena;
ororo badadia ba kwadidia, ba hapatapatadia,
ororo maraḡidia na uit momoruna heḡereḡerena ai ba halaodia;
16 ba tapodia hidi, bena lai ese baine odadia oho,
lai gubana ese baine odadia rohoroho.
Bena Iehova ba moalelaia,
Israel ena Helaḡa Diravana ba imodaia.

17 Ogoḡami taudia bona e dabumu taudia na ranu bae tahua, bena basie davaria,
a gadodia bae kaukau ranu-mase dainai;
una negana ai lau Iehova ese baina haere henidia,
lau, Israel Diravana, ese basina rakatanidia.
18 Ororo nemuka-nemukadia ai sinavai baina ha-arudia,
bona koura lalodiai ranu lohilohi gabudia baina kehodia;
tano ḡaḡaena na gohu ai baina halaoa,
bona tano kaukauna na ranu lohilohi gabuna ai baina halaoa.
19 Tano ḡaḡaena ai sida audia baina hado,
bona kela bona keroro bona olive audia danu;
tano kaukauna ai beroso bona tidara bona teasuru ^{▼▼Beroso, tidara, teasuru. Ini na au haida ladadia, Heberu taudia edia gado ai.} audia
baina hadodia hebou.
20 Bena taunimanima ese bae itaia, bena bae diba,
bae haeroa hebou bena lalodia bae parara,
Iehova imana ese ina na vada e karaia,
Israel ena Helaḡa Diravana ese vada e havaraia.

Iehova ese dirava koikoidia e guru henidia

21 Iehova na e tomu, Emui ginikau herevadia a gwaurai hedinarai;
Iakob ena pavapava na e tomu, Emui hereva ba hamomokanidia.
22 Ihamomokanina herevadia bae mailai,
bona dahaka baine vara bae hadibalaida.
Nega gunadia ḡaudia ba hamaorolai henimai,
bena baia haerodia,
bena baia diba dahaka dahaka na edia amo bae vara;
eiava do bae vara ḡaudia ba hamaorolai henimai.
23 Kerukeru vanegai bae vara ḡaudia ba hadibalaimai,
bena baia diba umui na didirava;
kara namo eiava kara dika ba kara,
bena baia gari, kudoumai bae hetaha.
24 A itaia, umui na dia ḡau ta,
emui ḡaukara na asi anina,
e abimui hidimu tauna na dika rohoroho.

25 Mirigini kahana amo tau ta na hatorea isi, bena vada ema,
dina e daemu kahana amo, bena ia ese lau ladagu baine hahanea;
ia ese lohia baine moimoilaidia,
raro nadidia ihahekamo-taodia ḡauna e moimoilaiamu na heto,
uro ikarana tauna ese raro e kuiamu na heto.
26 Daika ese matamana amo e gwauraia,
baita diba helaoreana?
Daika ese e gwaurai guna,
baitato “Ia na maoro” helaoreana?
Ta ese se herevalaia,
ta ese se gwauraia hedinarai,
ta ese emui hereva se kamonaidia.
27 Siona vada na gwaurai henia guna, q2 sivarai namo igwauraina tauna ta Ierusalem na heniamu.
28 A na roha heniamu negana ai tau ta asina itaiamu;
idia bogaragidiai asi hahealo tauna ta na henanadaimu negana ai e haere henigumu.
29 A itaia, iboudiai na lalo-haguhi asi anidia,
edia ḡaukara danu asi anidia,
edia auri kaivakukudia na lai mo, asi anidia.